LONDON, Uingereza
WAANDAAJI wa Tamasha la Wireless wametangaza kufutwa kwa tamasha la mwaka huu kufuatia uamuzi wa serikali ya Uingereza kumzuia msanii maarufu YE, anayejulikana pia kama Kanye West, kuingia nchini humo.
Kwa mujibu wa waandaaji, uwepo wa YE ulikuwa sehemu muhimu ya tamasha hilo, hivyo uamuzi huo umeathiri moja kwa moja maandalizi na kulazimu kufutwa kwa tukio zima. Wamesema kuwa wateja wote waliokuwa wamenunua tiketi watarudishiwa fedha zao kikamilifu.
Waandaaji wameeleza kuwa kabla ya kumualika msanii huyo, walifanya mashauriano na wadau mbalimbali wa tukio hilo na wakati huo hakuna aliyewasilisha pingamizi lolote. Hata hivyo, uamuzi huo ulianza kukosolewa baadaye kutokana na historia ya kauli tata za msanii huyo.
Katika taarifa yao, waandaaji walilaani vikali chuki dhidi ya Wayahudi, wakisisitiza kuwa ni jambo hatari na lenye kuumiza, huku wakikiri kuwa suala hilo limeathiri watu wengi binafsi.
Msanii YE amekuwa akikumbwa na ukosoaji mkubwa kutokana na kauli zake za awali zinazohusishwa na chuki dhidi ya Wayahudi, ikiwa ni pamoja na kuupa wimbo jina la “Heil Hitler” na kujitangaza kuwa Mnazi.
Kwa upande wake, YE amesema kuwa kuomba radhi pekee hakutoshi, lakini ameonesha matumaini ya kupata nafasi ya kuzungumza na jamii ya Wayahudi nchini Uingereza siku zijazo.
