Watu 15 wamekamatwa nchini Nigeria kufuatia tuhuma za unyanyasaji wa wanawake katika tamasha la kitamaduni lililofanyika jimbo la Delta.
ABUJA, Nigeria
POLISI nchini Nigeria wamewakamata watu 15 kufuatia tuhuma za unyanyasaji wa wanawake wakati wa tamasha la kitamaduni la Alue-Do lililofanyika katika mji wa Ozoro, jimbo la Delta.
Taarifa hiyo imekuja baada ya kusambaa kwa video kwenye mitandao ya kijamii zikionyesha makundi ya vijana wa kiume wakiwashambulia wanawake waliokuwa peke yao hadharani. Katika baadhi ya video hizo, wanawake wanaonekana wakifukuzwa, kushikiliwa na kudhalilishwa huku matukio hayo yakirekodiwa.
Matukio hayo yamezua mjadala mpana mtandaoni, huku watumiaji wa mitandao ya kijamii wakitumia kaulimbiu ya #StopRapingWomen kudai hatua za kisheria zichukuliwe dhidi ya wahusika na kuhimiza kuimarishwa kwa ulinzi wa wanawake.
Hata hivyo, Polisi wa jimbo la Delta wamekanusha madai yaliyosambaa kuwa tamasha hilo lilikuwa “tamasha la ubakaji,” wakisema hakuna taarifa rasmi ya ubakaji iliyowasilishwa kwa mamlaka kuhusiana na tukio hilo.
Akizungumza na kituo cha televisheni cha Channels TV, msemaji wa polisi wa jimbo hilo, Bright Edafe, alisema kuwa matukio yaliyoonekana kwenye video ni ya kusikitisha na hayakubaliki katika jamii.
Alieleza kuwa baadhi ya washukiwa walitambuliwa kupitia video hizo na tayari wamekamatwa na kupelekwa katika Idara ya Upelelezi wa Jinai (CID) kwa ajili ya hatua zaidi.
“Tumezungumza na wasichana wanne waliotajwa katika tukio hilo, na wote walisema hawakubakwa,” alisema Edafe, huku akibainisha kuwa uchunguzi bado unaendelea ili kubaini kwa kina kilichotokea.
Miongoni mwa waliokamatwa anatajwa pia kiongozi wa jamii husika, anayehusishwa na uratibu wa tamasha hilo, jambo ambalo limeibua maswali kuhusu uwajibikaji wa viongozi katika matukio ya kijamii.
Polisi wamewahimiza wananchi kutoa ushirikiano kwa kutoa taarifa zitakazosaidia uchunguzi huo, huku wakiahidi kuwachukulia hatua wote watakaobainika kuhusika na vitendo vya unyanyasaji.
Tukio hilo limeibua mjadala mpana kuhusu usalama wa wanawake katika mikusanyiko ya hadhara nchini Nigeria na umuhimu wa kuimarisha mifumo ya kuzuia ukatili wa kijinsia.
