16 C
New York

Dk. Samia: Jamii zinufaike na biashara ya hewa ukaa

Published:

Na Faraja Mulungu, Gazetini-DAR

JAMII zinazoshiriki katika uhifadhi wa misitu, mikoko na nyasi bahari zinapaswa kuwa miongoni mwa wanufaika wa mapato yanayotokana na biashara ya hewa ukaa, badala ya kubaki washiriki wa shughuli za uhifadhi bila kupata manufaa ya kiuchumi.

Huo ni msisitizo uliotolewa na Rais wa Jamhuri ya Muungano wa Tanzania, Dk. Samia Suluhu Hassan, katika Mkutano wa 31 wa Umoja wa Mataifa kuhusu Mabadiliko ya Tabianchi (COP31), unaofanyika Antalya, nchini Uturuki, ambako pia ametetea upatikanaji wa fedha za tabianchi kwa masharti nafuu, teknolojia na kujengewa uwezo kwa nchi zinazoendelea.

Hoja hiyo inaweka mbele nafasi ya wananchi wanaoishi katika maeneo yenye rasilimali za asili, ambao wanashiriki katika kuzilinda, lakini wanahitaji pia kunufaika na thamani ya kiuchumi inayozalishwa kupitia juhudi hizo.

Biashara ya hewa ukaa ni mfumo unaowezesha kununua na kuuza vyeti vinavyowakilisha upunguzaji au uondoaji wa gesi chafuzi katika angahewa. Kwa kawaida, cheti kimoja cha kaboni (Carbon Credit) kinawakilisha upunguzaji au uondoaji wa tani moja ya gesi chafuzi inayokadiriwa kwa kipimo cha kaboni dioksidi sawia (CO₂e).

Mfumo huo unatoa fursa kwa miradi ya uhifadhi wa misitu, upandaji miti, ulinzi wa mikoko, nyasi bahari, nishati jadidifu na usimamizi wa taka kuzalisha vyeti vinavyoweza kuuzwa baada ya matokeo yake kupimwa, kuripotiwa na kuthibitishwa.

Katika mnyororo huo, jamii zinaweza kushiriki katika uhifadhi na usimamizi wa rasilimali, huku mapato yanayotokana na mauzo ya vyeti yakitakiwa kugawanywa kwa utaratibu unaozingatia mchango wa wadau, haki zao na manufaa kwa maeneo yanayohusika.

Related articles

Recent articles