Na Hassan Mwasha, Gazetini
ACHANA na kuzihitaji pointi tatu. Yanga wataivaa Azam wakiwa na hasira baada ya matajiri hao wa Chamazi kuwafunga katika mchezo wa hivi karibuni wa nusu fainali ya Kombe la FA.
Wakati huo huo, Azam watashuka katika mchezo wa kesho Juni 24, 2026, wakitaka kuendeleza heshima waliyoipata CCM Kirumba kwa ushindi wa mabao 3-2.
Hata hivyo, safari hii zitakutana New Amaan Complex, Zanzibar, katika mchezo wa Ligi Kuu Bara, ambapo kila timu imeshacheza mechi 27 na kubakiza tatu tu.
Yanga walioko kileleni mwa msiamo wa Ligi wanafahamu wazi kuwa hata sare siyo nzuri katika hatua hii ya msimu.
Ni pointi mbili tu zinazowatofautisha na wapinzani wao wakubwa, Simba, wanaowapumulia kwa karibu katika nafasi ya pili.
Kwa upande wao, matajiri wa Chamazi, Azam, wako katika nafasi ya tatu baada ya kukusanya pointi 58.
MKOBA WA TAKWIMU
Katika mechi 27, Yanga wameshinda 20, sawa na asilimia 74, sare sita (22%) na kufungwa moja. Mabao ya kufunga ni 62 na imeruhusu tisa.
Yanga imeshinda nne na kufungwa moja katika mechi zake tano (za Ligi Kuu Bara) ilizocheza hivi karibuni.
Ilizifunga Singida Black Stars (2-0), Mashujaa (2-0), Namungo (3-1), na Ihefu (3-0), na kufungwa na Dodoma Jiji (3-2).
Kwa upande wao, Azam wameshinda 16 (59%), sare 10 (37%) na kuruhusu nyavu zao kutikiswa mara moja pekee.
Azam imeshinda mechi zote tano (za Ligi) ilizocheza hivi karibuni, ikizifunga Mashujaa (2-0), Singida (2-0), KMC (3-0), Prisons (2-0) na Pamba Jiji (2-0).
REKODI ZIMEKAAJE?
Katika mechi sita za zilizozikutanisha Yanga na Azam hivi karibuni, kila moja imeshinda mbili. Michezo miwili ilimalizika kwa suluhu (0-0).
Kwa upande wa Ligi, mechi tatu zilizopita zimeshuhudia kila timu ikishinda moja na kupata sare moja.
Mara ya mwisho kwa Yanga na Azam kuvaana kwenye Ligi ilikuwa Machi 16, 2026, mchezo wa raundi ya kwanza msimu huu wa Ligi Kuu Bara uliomalizika kwa suluhu (0-0).
