WASHINGTON, Marekani
Rais wa Marekani, Donald Trump, amesema wawakilishi wa nchi hiyo wanaelekea Islamabad kwa ajili ya mazungumzo yanayolenga kupunguza mvutano kati ya Marekani na Iran.
Kupitia ujumbe aliouandika kwenye mitandao ya kijamii, Trump amesema ujumbe huo unatarajiwa kuwasili Islamabad jioni ya kesho kwa ajili ya kuanza majadiliano.
“Tunatoa makubaliano ya haki na ya busara sana, na ninatumaini watayakubali,” amesema Trump, akiongeza kuwa iwapo upande wa Iran hautakubali, Marekani iko tayari kuchukua hatua kali zaidi.
Katika kauli iliyoibua mjadala, Trump ameonya kuwa kutokubaliwa kwa makubaliano hayo kunaweza kusababisha Marekani kushambulia miundombinu muhimu nchini Iran, ikiwemo vituo vya umeme na madaraja.
Aidha, amesema hakutakuwa na “huruma” iwapo mazungumzo yatashindikana, akisisitiza kuwa hatua hizo zitachukuliwa kwa haraka iwapo hakutakuwa na mwafaka wa kidiplomasia.
Kauli hiyo inaashiria kuendelea kwa mvutano wa kisiasa na kiusalama katika eneo la Mashariki ya Kati, huku juhudi za mazungumzo zikiendelea kutafutwa kama suluhisho la kudumu.
