RABAT, Morocco
TIMU ya taifa ya Senegal imetwaa ubingwa wa Kombe la Mataifa ya Afrika (AFCON) baada ya kuifunga Morocco bao 1-0 katika fainali ya kusisimua iliyochezwa kwenye uwanja wa wenyeji. Mechi hiyo ilijaa ‘drama’ na maamuzi tata, hali iliyoibua mijadala mikubwa miongoni mwa mashabiki na wachambuzi wa soka barani Afrika.
Bao pekee la Senegal lilifungwa katika kipindi cha pili, likiwapa “Simba wa Teranga” ushindi muhimu na kuwaandikia historia mpya katika soka la Afrika. Hata hivyo, dakika za mwisho za mchezo ndizo zilizovuta hisia za wengi, baada ya tukio lililozua utata mkubwa.
Kocha mkuu wa Senegal, Pape Thiaw, aliwashangaza wengi baada ya kuwaelekeza wachezaji wake kuondoka uwanjani kwa muda mfupi, akionekana kupinga uamuzi wa refa kuhusu penalti iliyotolewa kwa Morocco katika dakika za lala salama. Hatua hiyo ilitafsiriwa kama ishara ya maandamano dhidi ya kile alichokiona kuwa uamuzi usio wa haki.
Tukio hilo lilimhusu nyota wa Real Madrid, Brahim Diaz, aliyeanguka ndani ya eneo la hatari alipokuwa akipambana kuwania mpira na beki wa Senegal. Refa Jean-Jacques Ndala alisimamisha mchezo kwa muda, akishauriana na wasaidizi wake pamoja na teknolojia ya VAR, kabla ya kuamua kutoa penalti hiyo hatua iliyochukua muda mrefu na kuongeza presha kwa pande zote mbili.
Licha ya mvutano huo, Senegal iliendelea kujilinda kwa nidhamu hadi kipenga cha mwisho, na hatimaye kutangazwa mabingwa wa AFCON kwa mara nyingine, ikithibitisha ubora wao katika soka la Afrika.
Ushindi huo uliibua shangwe kubwa miongoni mwa mashabiki wa Senegal, huku Morocco wakibaki na maswali mengi kuhusu maamuzi ya waamuzi katika fainali hiyo ya kihistoria.
