Na Hassan Mwasha, Gazetini
JUMLA ya klabu 16 zinaisaka tiketi ya kuingia hatua ya robo fainali msimu huu wa 2026-27 wa michuano maarufu soka barani Afrika ya Ligi ya Mabingwa.
Droo ilichezeshwa Oktoba 28, 2026 mjini Cairo na kupatikana makundi manne, kila moja likiwa na timu nne, huku kila kundi likiwa na nafasi mbili tu kwa ajili ya robo fainali.
AL HILAL OMDURMAN – SUDAN
Vigogo wa soka la Sudan wanarejea hatua ya makundi kwa mara ya nane mfululizo. Timu hiyo imeshawahi kufika fainali mara mbili [1987 na 1992] na safari hii ni mara yao ya 15 kutia mguu hatua ya makundi.
Al Hilal walifika robo fainali msimu uliopita [2025-26]. Katika hatua za awali msimu huu, waliziondosha Aigle Noir [Burundi] na Sidama Bunna [Ethiopia] wakiwa hawajaruhusu bao.
CLUB AFRICAIN – TUNISIA
Wanarejea hatua ya makundi kwa mara ya kwanza tangu msimu wa 2018-19. Katika hatua ya awali, waliwatoa mabingwa mara tano wa Ligi ya Mabingwa, TP Mazembe, kwa kichapo cha jumla ya mabao 2-1.
Vigogo hao wa soka la Tunisia waliandika historia mwaka 1991 baada ya kuwa timu ya kwanza nchini humo kutwaa taji la Ligi ya Mabingwa Afrika. Hii ni mara yao ya tatu kufika makundi kwa miaka ya hivi karibuni na wana ukame wa miaka 10 bila ubingwa.
COLOMBE SPORTIVE – CAMEROON
Mabingwa wa soka la Cameroon wameingia makundi kwa mara ya kwanza, ingawa inakuwa mara ya pili kwao kushiriki mashindano hayo ya Ligi ya Mabingwa.
Colombe Sportive ni timu ya tatu katika historia ya nchi hiyo kufika hatua hiyo kwenye mashindano ya Ligi ya Mabingwa Afrika baada ya Canon Yaounde na Coton Sport. Ni mabingwa wa Ligi Kuu kwa misimu miwili mfululizo [2024-25 na 2025-26].
ESPERANCE SPORTIVE DE TUNIS – TUNISIA
Miamba ya soka la Tunisia na mabingwa mara nne wa Ligi ya Mabingwa, pia wakifika fainali mara tisa kwenye historia ya michuano hiyo.
Esperance walitwaa ubingwa kwa mara ya kwanza mwaka 1994, kabla ya kufanya hivyo tena mwaka 2011, 2018 na 2018/19. Hii ni mara yao ya 25 kutinga makundi. Ni mara yao ya 11 mfululizo.
FC NOUADHIBOU – MAURITANIA
Mabingwa mara 14 wa Ligi Kuu ya Mauritania. Hii ni mara yao ya pili kucheza makundi kwani walishawahi kufika hatua hiyo katika msimu wa 2023-24. FC Nouadhibou ndiyo timu pekee ya Mauritania iliyoweza kushiriki Ligi ya Mabingwa kwa miaka ya hivi karibuni.
Walifuzu makundi kwa kuzifunga FC San Pedro ya Ivory Coast na Vipers ya Uganda. Katika mechi mbili [nyumbani na ugenini] dhidi ya San Pedro, FC Nouadhibou walishinda jumla ya mabao 3-2, kabla ya kuitoa Vipers kwa mikwaju ya penalti.
HOROYA AC – GUINEA
Mabingwa wa Guinea wanarudi makundi kwa mara ya kwanza tangu msimu wa 2021-22. Kwa ujumla, hii inakuwa mara ya tano kwa kucheza hatua hii. Walishawahi kufika robo fainali mara mbili [2017-18 na 2018-19].
Horoya walivuka hatua ya awali kwa kuisukuma nje ya mashindano Al Merriekh. Waliwang’oa Wasudan hao kwa mikwaju ya penalti baada ya mechi mbili [nyumbani na ugenini] kumalizika kwa sare ya bao 1-1.
MAS DE FES – MOROCCO
Hii inakuwa mara ya kwanza kwao kufika makundi tangu michuano hiyo ilipoanza kuitwa Ligi ya Mabingwa badala ya Kombe la Washindi kama ilivyofahamika zamani.
Mas De Fes walishiriki michuano hii mara mbili [1984 na 1986] lakini wakati huo ikifahamika kwa jina la Kombe la Washindi na si Ligi ya Mabingwa. Inakuwa klabu ya saba ya Morocco kufika hatua hii ya makundi. Ni mabingwa wa Ligi ya Morocco kwa mara ya kwanza tangu mwaka 1985.
MC ALGER – ALGERIA
Walitwaa ubingwa wa michuano hii mwaka 1976 kwa kuifunga Hafia FC ya Guinea katika mchezo wa fainali. Hii inakuwa mara ya sita kwao kucheza makundi tangu Ligi ya Mabingwa ilipobadilishwa jina kutoka Kombe la Washindi.
Misimu miwili iliyopita [2024-25] walifika robo fainali lakini msimu uliopita [2025-26] waliishia hatua ya makundi. Waliingia makundi wakiitoa Rangers ya Nigeria kwa kichapo cha jumla ya mabao 3-2.
ORLANDO PIRATES – AFRIKA KUSINI
Orlando Pirates ndiyo waliobeba bendera ya Afrika Kusini baada ya mabingwa watetezi, Mamelodi Sundowns, kushindwa kuingia makundi. Pirates ya mjini Soweto ni mabingwa wa mwaka 1995 na walifika fainali mwaka 2013.
Hii inakuwa mara yao ya sita kuingia makundi lakini ni ya kwanza tangu msimu wa 2024-25. Walitwaa ubingwa wa Ligi Kuu msimu uliopita, ambao ni wa kwanza kwao tangu msimu wa 2011-12.
PETRO ATLETICO – ANGOLA
Inakuwa mara ya nane kwao kufika makundi na ndiyo klabu ya Angola iliyocheza mara nyingi hatua hii. Pirates iliwahi kutinga nusu fainali msimu wa 2000-01 na 2021-22.
Msimu huu, Petro waliweza kutinga hatua hii ya makundi kwa kuiondosha Scottland FC ya Zimbabwe kwa kichapo cha jumla ya mabao 3-2.
PYRAMIDS FC – MISRI
Walitwaa taji la Ligi ya Mabingwa msimu wa 2024-25 wakiwa wanashiriki kwa mara ya pili hatua ya makundi. Hii inakuwa mara ya nne mfululizo kwao kufika hatua hii.
Pyramids imeweza kuwa klabu yenye mafanikio makubwa katika soka la Misri na Afrika, ambapo pia ilibeba ubingwa wa CAF Super Cup mwaka 2025. Rekodi yao nzuri ni kufungwa mechi mbili tu za nyumbani kwenye historia ya Ligi ya Mabingwa.
RS BERKANE – MOROCCO
Walifika nusu fainali ya Ligi ya Mabingwa msimu uliopita [2025-26], ambapo walifungwa jumla ya mabao 2-1 na wapinzani wao wakubwa wa soka la ndani, AS FAR.
Berkane si timu ya kawaida kwenye michuano ya CAF kwani wametwaa ubingwa mara tatu ubingwa wa Kombe la Shirikisho [2019-20, 2021-22 na 2024-25}.
SIMBA SC – TANZANIA
‘Mnyama’ ndiyo klabu pekee ya Tanzania iliyofika mara nyingi [7] hatua hii ya makundi kwenye Ligi ya Mabingwa. Misimu miwili iliyopita, 2024-25, Simba walifika fainali ya Kombe la Shirikisho.
Wakati huo huo, Simba wamefika robo fainali ya Ligi ya Mabingwa mara nne [2018-19, 2020-21, 2022-23 na 2023-24]. Safari hii, wameingia makundi kwa kuitoa 15 de Agosto ya Guinea ya Ikweta kwa kichapo cha jumla ya mabao 9-1.
WILIETE SC – ANGOLA
Unaweza kuichukulia poa lakini timu hiyo ndiyo iliyoitoa Mamelodi Sundowns katika hatua ya awali msimu huu wa Ligi ya Mabingwa. Waliilazimisha Mamelodi sare ya bao 1-1 pale Afrika Kusini baada ya mechi ya kwanza nchini Angola kumalizika kwa suluhu [0-0].
Hii ni mara yao ya pili tu kushiriki Ligi ya Mabingwa. Msimu uliopita [2025-26], safari yao iliishia hatua ya awali walipofungwa na Yanga.
YANGA – TANZANIA
Hii inakuwa mara ya tano kwa Yanga kuingia makundi ya Ligi ya Mabingwa. Ilikuwa timu ya kwanza ya Tanzania kufika makundi mwaka 1998.
Msimu uliopita [2025-26], safari yao ilikwamia robo fainali lakini wana historia ya kufika fainali ya Kombe la Shirikisho msimu wa 2022-23. Walitinga makundi msimu huu kwa kuitoa CFFA 8-1 ya Madagascar.
ZAMALEK SC – MISRI
Hao ni mabingwa mara tano wa Ligi ya Mabingwa Walibeba ‘ndoo’ hiyo mwaka 1984, 1986, 1993, 1996 na 2002 lakini safari hii wameingia makundi kwa mara ya kwanza baada ya kukosekana kwa misimu mitatu.
Kwa ujumla, klabu hiyo ya mjini Cairo ina mataji 13 ya CAF, likiwamo la Super Cup. Hii inakuwa mara yao ya 14 kufika makundi.
