Na Hassan Mwasha, Gazetini – DAR
ENDAPO Mashujaa FC ya mkoani Kigoma itashinda mechi yake ya leo Novemba 22, 2026, basi itamaliza wikiendi hii ikiwa ndani ya ‘Top 4’ kwenye msimamo wa Ligi Kuu Bara.
Iko hivi; Mashujaa wanaoshika nafasi ya tisa kwenye msimamo wakiwa na pointi 15, watakuwa ugenini leo kumenyana na wenyeji wao, Geita Gold.
Hivyo basi, ikiwa wataifunga Geita, Mashujaa watafikisha pointi 18 na kwenda kuitoa Singida Black Stars inayoshika nafasi ya nne ikiwa na pointi 17.
Hata ikitokea TRA United inayoshika nafasi ya 12 ikiwa na pointi 11 ikaifunga Kagera Sugar katika mchezo mwingine wa leo, bado haitafikisha pointi 18 watakazokuwa nazo Mashujaa.
Geita, kwa upande wao, wanashika nafasi ya 14 kwenye msimamo, ambapo wamekusanya pointi tisa pekee kufikia hatua hii ya mzunguko wa 11.
Mashujaa wanarudi mzigoni baada ya mapumziko ya kalenda ya FIFA wakiwa na ‘mzuka’ kwani waliifunga Pamba bao 1-0 katika mchezo wa mwisho.
Aidha, Geita wana kila sababu ya kujipanga kwani wanarejea dimbani wakiwa na kumbukumbu mbaya ya kufungwa kwa matokeo kama hayo dhidi ya Polisi Tanzania.


