Na mwandishi wetu, Gazetini
BANDARI ya Dar es Salaam imepiga hatua katika kipimo cha ufanisi wa bandari duniani, ikishika nafasi ya 255 katika mwaka 2025, mbele ya Bandari ya Mombasa nchini Kenya pamoja na Durban na Cape Town za Afrika Kusini, kwa mujibu wa Kielezo cha Ufanisi wa Bandari za Kontena (CPPI).
Kwa mujibu wa ripoti ya Benki ya Dunia kwa kushirikiana na S&P Global Market Intelligence, Bandari ya Dar es Salaam imepata alama hasi 7.75, huku Mombasa ikishika nafasi ya 396 kwa alama hasi 231.49. Durban imeorodheshwa katika nafasi ya 398 kwa alama hasi 241.67, wakati Cape Town ikiwa nafasi ya 400 kwa alama hasi 302.58.
Matokeo hayo yanaifanya Dar es Salaam kuwa mbele ya Mombasa kwa nafasi 141, Durban kwa nafasi 143 na Cape Town kwa nafasi 145, yakionyesha tofauti ya utendaji wa bandari hizo katika kipimo hicho.
CPPI hupima ufanisi wa bandari kwa kuzingatia muda ambao meli za mizigo ya kontena hutumia bandarini, ukiwamo muda wa kusubiri na muda wa kuhudumiwa kwenye gati.
Dar es Salaam ilivyopiga hatua
Takwimu za CPPI zinaonyesha kuwa Bandari ya Dar es Salaam imeendelea kuboresha matokeo yake katika miaka ya karibuni. Mwaka 2021, bandari hiyo ilikuwa na alama hasi 176, kabla ya kuboreka hadi hasi 72 mwaka 2022.
Mwaka 2023, alama zake zilikuwa hasi 80, zikaboreka hadi hasi 53 mwaka 2024 na kufikia hasi 7.75 mwaka 2025.
Katika nafasi za kimataifa, Dar es Salaam imepanda kutoka nafasi ya 360 mwaka 2024 hadi nafasi ya 255 mwaka 2025, hatua inayomaanisha kupanda kwa nafasi 105 ndani ya mwaka mmoja.
Kwa upande mwingine, Bandari ya Mombasa imeshuka kutoka nafasi ya 375 mwaka 2024 hadi nafasi ya 396 mwaka 2025.
Hata hivyo, Dar es Salaam bado iko nyuma ya Bandari ya Mogadishu nchini Somalia, ambayo imeshika nafasi ya 127 duniani kwa alama 13.94, ikiwa mbele ya Dar es Salaam kwa nafasi 128. Bandari ya Lamu nchini Kenya imeorodheshwa katika nafasi ya 345 kwa alama hasi 47.05.
Katika ukanda wa Kusini mwa Afrika, Bandari ya Dar es Salaam pia imekuwa mbele ya baadhi ya bandari muhimu, zikiwamo Maputo nchini Msumbiji iliyoshika nafasi ya 273, Beira nafasi ya 315 na Nacala nafasi ya 356.
Aidha, Dar es Salaam imekuwa mbele ya Port Elizabeth ya Afrika Kusini, iliyoshika nafasi ya 314, na Coega/Ngqura iliyoorodheshwa katika nafasi ya 380.
Bandari nyingine zilizokuwa nyuma ya Dar es Salaam ni Port Victoria iliyoshika nafasi ya 287, Le Port nafasi ya 316, Longoni nafasi ya 367 na Port Louis nafasi ya 369.
Matokeo hayo yanaipa Tanzania nafasi ya kutathmini namna ufanisi wa Bandari ya Dar es Salaam unavyoweza kuongeza ushindani wake katika kuhudumia mizigo ya ndani na ile inayokwenda katika nchi jirani.
Kwa mujibu wa Benki ya Dunia, CPPI ni kipimo kinacholenga kutathmini utendaji wa bandari na kubainisha maeneo yanayohitaji maboresho ili kuongeza ufanisi katika shughuli za usafirishaji wa mizigo ya kontena.
Hatua iliyofikiwa na Bandari ya Dar es Salaam ni kiashiria cha maendeleo katika kipimo hicho, huku uendelevu wa mafanikio ukitegemea uwezo wa kuboresha huduma, kupunguza ucheleweshaji na kuhakikisha ufanisi huo unaleta manufaa yanayopimika kwa wafanyabiashara na uchumi wa Tanzania pamoja na nchi zinazotumia bandari hiyo.
