Na mwandishi wetu, Gazetini
UNYWAJI wa pombe unasababisha vifo vya zaidi ya watu 800,000 kila mwaka barani Ulaya, sawa na kifo kimoja kati ya kila vifo 11, kwa mujibu wa ripoti mpya ya Shirika la Afya Duniani (WHO).
Katika ripoti hiyo iliyochapishwa wiki hii, WHO imesema Ulaya ndilo bara lenye viwango vya juu zaidi vya unywaji pombe duniani, hali inayochangia kwa kiasi kikubwa vifo vya mapema pamoja na majeraha mbalimbali yanayoweza kuzuilika.
Ripoti hiyo imeeleza kuwa sehemu kubwa ya vifo vinavyohusishwa na pombe vinatokana na kujidhuru, ajali za barabarani, kuanguka, pamoja na majeraha mengine yanayotokana na ulevi.
Kwa mujibu wa shirika hilo la Umoja wa Mataifa, pombe pia ina uhusiano wa karibu na ongezeko la vurugu na migogoro ya kijamii, ikiwemo mashambulizi, mapigano na unyanyasaji wa majumbani. WHO imebainisha kuwa unywaji pombe ni miongoni mwa sababu kuu zinazochangia vifo vinavyotokana na majeraha ya vurugu katika eneo lote la Ulaya.
Utafiti huo umeonyesha pia kuwa vijana wako katika hatari kubwa zaidi, kwani unywaji pombe huathiri ukuaji wa ubongo, uwezo wa kufanya maamuzi sahihi wakati wa ujana, na huongeza hatari za tabia hatarishi hadi utu uzima.
Akizungumza kuhusu matokeo hayo, Carina Ferreira-Borges, Mshauri wa Kanda wa Pombe, Mihadarati na Afya ya Magereza katika WHO barani Ulaya, amesema pombe ni kiungo chenye madhara makubwa kiafya.
“Pombe ni sumu ambayo si tu husababisha aina saba za saratani na magonjwa mengine yasiyoambukiza, bali pia hudhoofisha uwezo wa kufanya maamuzi na kujidhibiti, hupunguza muda wa mwitikio wa mwili, hupunguza uratibu, na kuongeza tabia ya kuchukua maamuzi hatarishi,” amesema.
Wakati hali ikiwa hivi barani Ulaya, utafiti mwingine uliofanywa hivi karibuni nchini Marekani umebaini kuwa unywaji wa pombe kupita kiasi unasababisha kifo cha mtu mmoja kati ya kila watu watano wanaofariki nchini humo, jambo linaloonyesha ukubwa wa tatizo hilo kimataifa.
