Na Mwandishi Wetu, Gazetini
Tume ya Kudhibiti UKIMWI Tanzania (TACAIDS) imewakutanisha wadau wa taasisi zinazofanya tafiti kuhusu VVU na UKIMWI nchini kujadili matokeo ya tafiti mbalimbali zilizofanyika kati ya mwaka 2018 hadi 2024.
Akizungumza katika kikao hicho, Kaimu Mkurugenzi Mtendaji wa TACAIDS, Dk. Catherine Joachim, alisema lengo la mkutano huo ni kuwezesha watafiti kushirikiana, kutathmini mafanikio ya tafiti zao, na kubuni njia bora za kuhakikisha matokeo ya tafiti yanasaidia katika kutunga sera madhubuti.
Mikakati ya maendeleo ya tafiti
Dk. Joachim alisema kikao hicho kitaweka mikakati ya kuongeza tafiti zenye ubora na kuimarisha ushirikiano kati ya taasisi mbalimbali. “Kupitia kikao hiki, tutaweka mkakati wa kurahisisha upatikanaji wa tafiti zote zilizofanyika nchini kuhusu VVU na UKIMWI,” alisema Dk. Joachim.
Aliongeza kuwa TACAIDS itaanza kutengeneza kanzidata ya tafiti zote zilizofanyika nchini kuhusu VVU na UKIMWI ili kurahisisha upatikanaji wa taarifa hizo kwa wadau na watunga sera.
Wito wa ushirikiano na ufahamu wa tafiti
Wataalam waliohudhuria kikao hicho walisisitiza umuhimu wa kuwepo kwa mfumo unaowezesha upatikanaji wa tafiti zote kuhusu VVU na UKIMWI. Walipendekeza pia vikao kama hivyo viwe vya mara kwa mara, na tafiti ziwasilishwe kwa lugha rahisi kueleweka kwa watunga sera na wadau wengine.
Aidha, watafiti walishauri TACAIDS kuwahamasisha watafiti kuandaa muhtasari wa tafiti zao kwa lugha inayowezesha kueleweka kirahisi na kwa watumiaji wa kawaida.
Changamoto za raslimali
Pamoja na mafanikio, suala la upungufu wa raslimali fedha liliibuliwa, ambapo ilisisitizwa kuwa Serikali inapaswa kuongeza ufadhili katika maeneo yasiyofadhiliwa na wadau, hususan kampeni za kutoa elimu ya VVU na UKIMWI.
Hatua za mwisho
Mkurugenzi Msaidizi kutoka Ofisi ya Serikali, Elias Omar, aliwapongeza washiriki wa kikao hicho kwa hatua hiyo ya awali. Alisema makubaliano yaliyofikiwa yatasaidia sana katika kuhakikisha tafiti zinachangia katika kupanga mipango ya kitaifa kwa ufanisi zaidi.
TACAIDS iliahidi kushirikiana na Taasisi ya Taifa ya Utafiti wa Magonjwa ya Binadamu (NIMR) ili kuimarisha usimamizi wa raslimali na kuendeleza utafiti wenye tija katika mapambano dhidi ya VVU na UKIMWI.
