Na Nora Damian, Gazetini
Naibu Waziri wa Nchi Ofisi ya Makamu wa Rais (Muungano na Mazingira), Khamis Hamza Khamis, amezitaka taasisi mbalimbali kutengeneza mazingira yatakayowezesha wananchi kutumia nishati safi ya kupikia ili kuiokoa Tanzania na uharibifu wa mazingira. Ripoti ya WHO inaonyesha watu bilioni 2.4 duniani wanategemea nishati chafu ya kupikia, hali inayosababisha upotevu wa hekta milioni 3.9 za misitu kila mwaka Afrika.
Akizungumza Julai 14, 2024, wakati wa tamasha la kuhamasisha matumizi ya nishati safi lililoandaliwa kwa ushirikiano na Taasisi ya Upskills, Khamis alihimiza matumizi ya nishati safi ya kupikia na kuongeza juhudi za upandaji miti. Alisema uharibifu wa mazingira, hasa ukataji miti ovyo kwa shughuli za mifugo na kilimo, ni tatizo kubwa.
Khamis aliwataka wanafunzi na walimu kuelekeza nguvu katika kampeni ya Mama Samia ya upandaji miti ili Tanzania iwe ya kijani. Alipendekeza badala ya kukata keki kusherehekea siku ya kuzaliwa, watu wapande miti kunusuru taifa dhidi ya uharibifu wa mazingira.
Aidha, Khamis aliwasihi wamiliki wa viwanda na migodi kuepuka kuchafua vyanzo vya maji na kuhakikisha maji machafu hayaingii kwenye vyanzo vya maji.
Mkurugenzi wa Upskills, Tinna Masaburi, alisema tamasha hilo lililenga kuelimisha umma kuhusu matumizi ya nishati safi ya kupikia ili kupunguza ukataji miti ovyo, hasa katika Jiji la Dar es Salaam.
Mbunge wa Viti Maalumu Mkoa wa Dar es Salaam, Janeth Masaburi, alisifu jitihada za Rais Samia Suluhu Hassan katika kuhamasisha matumizi ya nishati safi ya kupikia, akisema lengo ni asilimia 80 ya wanawake watumie nishati hiyo ifikapo mwaka 2030.
Katika tamasha hilo, Rais Samia Suluhu Hassan alitunukiwa tuzo ya heshima na Taasisi ya Upskills kwa jitihada zake za kuhamasisha matumizi ya nishati safi ya kupikia.
