Na Mwandishi Wetu, Gazetini
Kituo cha Kudhibiti Magonjwa Afrika (Africa CDC) kimeeleza wasiwasi kuhusu kuongezeka kwa visa vya ugonjwa wa Mpox barani Afrika. Katika mkutano wa mtandaoni, Mkurugenzi Mkuu wa kituo hicho, Dk. Jean Kaseya, alisema wanashirikiana na wadau wa kimataifa, ikiwemo Umoja wa Afrika, ili kuangalia uwezekano wa kutangaza hali ya dharura ya kiafya.
“Tunaona ongezeko la visa… kanda zote tano zimeathirika,” alisema Kaseya, akibainisha kuwa katika siku tano zilizopita, nchi sita zimegundua visa vipya, huku nchi 18 zikiwa katika “hatari kubwa”. Ingawa mlipuko wa Mpox uligunduliwa mwaka 2022, mwaka huu umeona kasi ya kuenea kwa ugonjwa huo katika nchi kadhaa barani Afrika.
Mpox huenea kupitia mawasiliano kati ya binadamu na wanyama, na pia kati ya binadamu kwa njia ya maingiliano ya kimwili, ikiwemo kubadilishana majimaji ya mwili. Kaseya alieleza kuwa maingiliano ya kimapenzi ni sababu ya kuongezeka kwa visa mashariki mwa Jamhuri ya Kidemokrasia ya Kongo (DRC), ambapo asilimia 60 ya wagonjwa ni watoto walio chini ya miaka 15. “Na tunajua ni kwa njia ya maambukizi ya kimapenzi… hii ni tahadhari kubwa kwa dunia,” alisema.
Kaseya alisema usimamizi wa visa katika nchi zilizoathirika ni changamoto na alitoa wito wa msaada. Alieleza kuwa vikwazo vya kupambana na ugonjwa huu ni pamoja na ukosefu wa usalama, ukosefu wa umakini wa kimataifa, na upungufu wa chanjo. Alisisitiza kuwa chanjo ni chache huku mamia ya watu wakiendelea kuambukizwa barani Afrika.
Kituo cha Africa CDC kimekuwa kikifanya juhudi za kupata chanjo milioni 10 kwa bara la Afrika, kuanzia na dozi 200,000. Kesi ya kwanza ya Mpox kwa binadamu ilirekodiwa mwaka 1970 katika DRC, eneo ambalo ugonjwa huo umekuwa wa kawaida. Hata hivyo, katika mlipuko wa 2022, visa vilianza kuonekana katika nchi mbalimbali ambako Mpox haukuwahi kutokea hapo awali.
Kaseya alisema mabadiliko ya tabianchi yanaweza kuwa sababu ya kuongezeka kwa maambukizi, kwani yamewaweka binadamu karibu zaidi na wanyamapori. Alipendekeza mbinu ya “afya moja” katika kukabiliana na janga hili.
